14.01.2022
13.01.2022-ci il tarixdə Gəncə Regional Mədəniyyət İdarəsi Gəncə şəhər Mərkəzləşdirilmiş Kitabxana Sisteminin 24 saylı kitabxana filialı görkəmli dövlət xadimi Xudadat bəy Rəfibəylinin anadan olmasının 145 illiyi münasibətilə "Azərbaycan xalqının tarixi yaddaşında yaşayanlar" başlıqlı onlayn tədbir keçirdi. Tədbiri giriş sözü ilə filialın müdiri Rahilə Qasımova açaraq Xudadat bəy Rəfibəylinin Azərbaycan Xalq Cümhuriyyətinin liderlərindən biri və Gəncəli olması haqqında qısa məlumat verdi. Tədbirdə AMEA-nın Gəncə bölməsi tarix diyarşünaslıq şöbəsinin elmi işçisi Namlet Allahverdiyev və AMEA-nın Gəncə bölməsi Nizami Gəncəvi irsinin tərcüməsi şöbəsinin böyük elmi işçisi Aləmzər Tağıyeva çıxış etdilər. Çıxış edənlər əvvəlcə Rəfibəylilər soyadı haqqında ətraflı məlumat verdilər. Xalqımızın milli istiqlal mübarizəsinin fəal iştirakçılarından olan görkəmli dövlət xadimi Xudadat bəy Azərbaycan Xalq Cümhuriyyətinin qurulmasında və fəaliyyətində böyük xidmətlər göstərib. Xudadat bəy dövlət xadimi olmaqla yanaşı həmdə o zaman üçün xaricdə təhsil alan ilk ali təhsilli cərrahlardan biri olmuşdur. O həm də Azərbaycanda ilk səhiyyə naziri olmuşdur. Tədbirdə Xudadat bəyin gəncəli olaraq xalq üçün gördüyü böyük işlərdən danışıldı. Həmçinin onun həbsinə etiraz olaraq Gəncə və ətraf rayonların əhalisinin göstərdiyi böyük sevgidən də söhbət açıldı. Bu xeyirxah, ədalətli, nüfuzlu insanı Azərbaycan hökuməti diqqətdən kənarda qoymayıb. İllər keçəcək ancaq Xudadat bəyin o böyük amalı xalqının qəlbində əbədi yaşayacaq. Bu gün şəhərimizdə onun qızı Xalq şairi Nigar Rəfibəyli soyadını daşıyan bir küçə və 43 saylı tam orta məktəb var.