Azərbaycan Rəssamlar İttifaqının üzvü, Respublikanın Əməkdar Rəssamı, Gəncə şəhər Uşaq Rəssamlıq Məktəbinin sabiq müəllimi, təqaüdçü Abdullayev Faiq Nağı oğlu 28 oktyabr 2020-ci il tarixində 75 yaşında vəfat etmişdir.
Abdullayev Faiq  Nağı oğlu 09 may 1945-ci ildə Gəncə şəhərində anadan olmuşdur.
O, orta təhsilini Gəncə şəhər 23 saylı orta məktəbdə almışdır.
Faiq  Abdullayev ilk ibtidai ixtisas təhsilini Gəncə şəhər Uşaq Rəssamlıq Məktəbində almışdır.
1963-1968-ci illərdə Əzim Əzimzadə adına Bakı Rəssamlıq Məktəbində oxumuşdur. 1969-1976-cı illərdə V.Muxin adına Leninqrad Ali Rəssamlıq Sənaye məktəbini sənaye incəsənəti ixtisası üzrə bitirmişdir.
1985-1986-cı illərdə Məhsəti Gəncəvi adına Gəncə Pedaqoji Texnikumunda rəsm müəllimi, 1986-1991-ci illərdə Gəncə şəhər Arxitektura və İnşaat şöbəsində rəssam, 1996-1997-ci illərdə Gəncə şəhər Uşaq Rəssamlıq Məktəbində direktor vəzifəsində, 1997-1998-ci illərdə Gəncə şəhər Tərtibat, Reklam və Dizayn şöbəsində rəssam işləmişdir.
1998-1999-cu illərdə Gəncə şəhərində fəaliyyət göstərən “Kəpəz” Bədii Yaradıcılıq İstehsalat Mərkəzində rəssam işləmişdir.
1999-2011-ci illərdə Gəncə şəhər Uşaq Rəssamlıq Məktəbində müəllim işləmişdir.
Sərgiləri: Bakı şəhəri (1995), Ukrayna Respublikasının Odessa şəhəri (2003), Şəmkir rayonu (2015), Gəncə şəhəri (2015).
Təltiflər: Odessa şəhərinin fəxri fərmanı (2003), Azərbaycan Respublikasının Mədəniyyət Nazirliyinin fəxri fərmanı (2005), Gəncə şəhər İcra Hakimiyyətinin fəxri fərmanı (2015).
2017-ci ildə Azərbaycan Respublikasının Prezidentinin Sərəncamı ilə ona “Respublikanın Əməkdar Rəssamı” fəxri adı verilmişdir.
Allah rəhmət eləsin.