F.Əmirov adına Gəncə Dövlət Filarmoniyasında ABŞ səfirliyinin təşkilatçılığı ilə, Azərbaycan Respublikasının Mədəniyyət Nazirliyinin, Gəncə şəhər İcra Hakimiyyətinin dəstəyi ilə “Buyeponqo” musiqi qrupunun konserti baş tutub. Konsertdə məktəblilər və mədəniyyət işçiləri iştirak ediblər. Konsertdən əvvəl çıxış edən ABŞ səfirliyinin mədəniyyət və təhsil işləri üzrə müşaviri Riçard Pinkham hər iki ölkənin dostluq münasibətindən danışıb. O bildirib ki, konsertin keçirilməsində məqsəd Amerika mədəniyyətini Azərbaycanda tanıtmaqdır. Müşavir Gəncədə olduqlarından məmnun olduğunu bildirib. Beş nəfərdən ibarət Afro-Latin “Buyeponqo” qrupu Latın Amerikası diasporuna xas hip-hop, pank, fank və caz sədalarının qarışığından ibarət çılğın tropik üslublu musiqilər ifa edib. Qeyd edək ki, “Buyeponqo”nun Azərbaycandakı bütün konsertləri pulsuz və ictimaiyyət üçün açıqdır. ABŞ səfirliyi canlı hip-hop, pank, fank və caz musiqisi ilə maraqlanan hər kəsi aşağıdakı tədbirlərdə iştiraka dəvət edir. Afro-Latin “Buyeponqo” musiqi qrupu Gəncədən sonra Şəki, Zaqatala və Qəbələdə də konsert verəcək.