12.06.2026
11 iyun 2026-cı il tarixində Receb Öztop tərəfindən Gəncə-Daşkəsən Regional Mədəniyyət İdarəsi və Gəncə şəhərində fəaliyyət göstərən uşaq incəsənət məktəbləri Azərbaycan–Türkiyə mədəni əlaqələrinin inkişafına, birgə layihələrin həyata keçirilməsinə və səmərəli əməkdaşlığa verdikləri töhfəyə görə təltif olunmuşlar.
Təltifetmə mərasimində çıxış edən Baş konsul Receb Öztop iki qardaş ölkə arasında mədəniyyət sahəsində əməkdaşlığın əhəmiyyətini vurğulayaraq, Gəncə-Daşkəsən Regional Mədəniyyət İdarəsinin və uşaq incəsənət məktəblərinin həyata keçirdiyi təşəbbüslərin gənc nəslin milli-mənəvi dəyərlər ruhunda yetişməsinə, eləcə də Azərbaycan və Türkiyə xalqları arasında dostluq münasibətlərinin daha da möhkəmlənməsinə xidmət etdiyini qeyd etmişdir.
Tədbirdə bildirilib ki, son illərdə regional mədəniyyət müəssisələri ilə Türkiyənin diplomatik nümayəndəliyi arasında keçirilən birgə konsertlər, sərgilər, yaradıcılıq layihələri və mədəni mübadilə proqramları əməkdaşlığın genişlənməsinə mühüm töhfə vermişdir.
Sonda Gəncə-Daşkəsən Regional Mədəniyyət İdarəsinin əməkdaşlarıi və uşaq incəsənət məktəblərinin nümayəndələri göstərilən yüksək diqqətə görə təşəkkürlərini bildirərək, gələcəkdə də Azərbaycan–Türkiyə mədəni əlaqələrinin inkişafı istiqamətində birgə fəaliyyətin davam etdiriləcəyini vurğulamışlar.