01.06.2026
1 İyun – Uşaqların Beynəlxalq Müdafiəsi Günü münasibətilə Gəncə-Daşkəsən Regional Mədəniyyət İdarəsinin dəstəyi və Nizami Gəncəvi Muzeyinin təşkilatçılığı ilə qayğıya ehtiyacı olan uşaqların iştirakı ilə xüsusi sosial-mədəni tədbir keçirilib. "Qayğıya ehtiyacı olan uşaqlar birgünlük muzey idarəçiləri oldular" adlı tədbir çərçivəsində iştirakçılar muzeyin direktoru, fond müdiri, elmi işçisi, bələdçisi və mühafizə polisi kimi vəzifələri bir günlük icra edərək muzeyin fəaliyyəti ilə yaxından tanış olublar. Uşaqlar onlara həvalə olunan tapşırıqları maraq və məsuliyyətlə yerinə yetirərək müxtəlif sahələr üzrə bacarıqlarını nümayiş etdiriblər.
Tədbirin məqsədi qayğıya ehtiyacı olan uşaqların sosial inteqrasiyasına dəstək göstərmək, onların özünəinam hissinin formalaşmasına və gələcək peşələrə marağının artırılmasına töhfə vermək, həmçinin asudə vaxtlarının səmərəli təşkilini təmin etmək olub.
Tədbirin sonunda iştirakçılar üçün çay süfrəsi təşkil edilib, onlara hədiyyələr təqdim olunub və xatirə şəkilləri çəkdirilib.
Sosial əhəmiyyət daşıyan tədbir uşaqlarda xoş təəssüratlar yaradaraq onların cəmiyyət həyatında fəal iştirakının təşviqinə xidmət edib.